Përleshjen e Policëve e Ndalën Qytetarët
Dolën në vendin e ngjarjes së një aksidenti automobilistik, në rrugën që lidh Komoranin me Shtimen, për të parandaluar konfliktin e mundshëm mes të aksidentuarve dhe për të kryer matjet e nevojshme që përcaktojnë fajtorin, por u përfshinë vetë në një grindje që mund të përfundonte me pasoja.
Tre pjesëtarë të Policisë së Kosovës, u përleshën me fjalë, shtyrje e fyerje, të hënën që shkoi, duke harruar se për çfarë kishin dalë në terren.
Të pranishmit e rastit, gjatë kësaj ndodhie, treguan për Gazetën Jeta në Kosovë se në kulmin e grindjes së punonjësve të policisë, dy prej tyre nxorën nga brezi armët zyrtare, por qytetarët e mbledhur rreth tyre, i ndanë dhe nuk lejuan që grindja të dilte jashtë kontrollit.
Sipas dëshmitarëve, duke iu përgjigjur thirrjes për një aksident trafiku, pas disa minutash në vend të ngjarjes erdhi një patrullë e njësive patrulluese të policisë. Patrullat e tilla janë të parat që reagojnë për të qetësuar të përfshirët në aksidente dhe për të siguruar vendin e aksidentit.
“Kush je ti me na urdhëru neve. Isa Dreshaj
Patrulla erdhi nga njësitë e policisë së Shtimes, ndërsa menjëherë një pjesëtar i saj, rreshteri Naim Rexha thirri njësinë e trafikut për t’i bërë matjet e aksidentit. Ai ishte aty me një koleg të tijin.
Dëshmitari Isa Dreshaj tregon se patrulla e policisë së trafikut është vonuar më shumë se një orë e gjysmë, ndërsa kur ka ardhur ia ka zënë rrugën makinës me të cilën policët nga Shtimja kishin udhëtuar drejt vendit të aksidentit.
Dreshaj tregon se Rexha u ka kërkuar policëve të trafikut që ta lirojnë rrugën, por ata e kanë fyer, duke i thënë: “Kush je ti me na urdhëru neve”.
Sipas dëshmitarit, në fjalosje e sipër njëri nga policët e trafikut e ka goditur rreshterin Rexha me një bllok shënimesh. Të dy policët e trafikut pastaj kanë nxjerrë revolet zyrtare nga brezi.
Ngjarjen e rëndë thuajse me të njëjtat fjalë e përshkruan edhe Shaqir Jetullahu që si Dreshaj qëlloi aty ku policët deshën gati të vriten mes veti.
“Kur kanë ardhë mas dy ore ata [policët e trafikut], e kanë parku veturën në mes të rrugës. Polici i Shtimes u ka kërku me ua liru rrugën dhe aty i kanë shti fjalët”, thotë Jetullahu.
“Kur kanë ardhë mas dy ore ata [policët e trafikut], e kanë parku veturën në mes të rrugës. Shaqir Jetullahu
Ai tregon se pas fjalosjes, ka pasur edhe shtyrje mes të përfshirëve në grindje, ndërsa pas shtyrjes, polici i trafikut ka nxjerrë revolen nga brezi.
Hysen Kurtbobaj, që po ashtu pa nga afër grindjen mes tre pjesëtarëve të Policisë së Kosovës, tha se konflikti u acarua kur rreshteri Rexha u kërkoi llogari policëve të trafikut për vonesën, ndërsa ua bëri me dije se do t’i lajmëronte eprorët për këtë.
“Si ka ardhë njësia e trafikut rreshteri u ka thanë: “ku jeni o burrat e dheut”, e ata [policët] ia kanë kthy kush je ti me na komandu dhe kanë dalë prej xhipit duke i thanë [rreshterit] se vimë kur dojmë vetë”, shpjegon Kurtbobaj.
Pas këtyre fjalëve, Kurtbobajt thotë se rreshteri e ka shtyrë policin e trafikut, ndërsa polici ka nxjerrë revolen.
Sipas Kurtbobajt, qytetarët më pas u kanë hyrë ndërmjet policëve të nxehur, duke mos lejuar që të përdoreshin armët.
Përveç rreshterit Naim Rexha, në këtë incident u përfshinë edhe policët e trafikut Sejdi Rashiti dhe Vesel Bytyqi.
Rastin e konfliktit mes tyre, policia e mbajti fshehur, ndërsa tre të përfshirët në grindje nuk deshën të flasin për Gazetën Jeta në Kosovë, me arsyetimin se një gjë të tillë nuk ua lejon rregullorja e brendshme e policisë.
Gazeta ka kuptuar për përleshjen të njëjtën ditë, më 16 shtator.
Zëdhënësi i policisë për rajonin e Ferizajt Agim Gashi tregoi se rreshteri dhe dy policët e trafikut janë suspenduar.
“Si ka ardhë njësia e trafikut rreshteri u ka thanë: “ku jeni o burrat e dheut”. Hysen Kurtboja
Ai në përgjigjet e tij me shkrim nuk tregoi nëse gjatë kacafytjes së policëve janë përdorur arrmët e zjarrit, ndërsa nuk u përgjigj as nëse shkak i incidentit ka qenë vonesa e policëve të trafikut për të dalë në vendin e aksidentit.
Zyrtarët e Inspektoratit Policor thanë se rastin në bashkëpunim me prokurorin e kanë inicuar si sulm.
“Tre zyrtarët policorë janë suspenduar për 48 orë dhe në ndërkohë hetuesit e IPK-së kanë nisur hetimet për veprën penale të sulmit”, thotë Arbër Beka.
Beka nuk ka bërë me dije se cili nga të përfshirët dyshohet seishte nxitës kryesor i konfliktit.
Zyrtarët policorë janë kthyer në vendin e punës, derisa vazhdojnë të hetohen nga Inspektorati Policor i Kosovës.