Ankesat 52 Milionëshe të Pashqyrtuara nga OSHP-ja
Janë bërë gjashtë muaj prej se kur Bordi Drejtues i Organit Shqyrtues të Prokurimit (OShP) është jofunksional.
Institucionet publike që nga fillimi i gushtit të 2013-ës mund të lidhin kontrata me kompanitë e përzgjedhura, duke shpërfillur ankesat e konkurrentëve që humbin garën në tenderët publikë.
Qeveria e vendit krijoi mundësinë për ndërmarrjen e këtij veprimi, duke mos plotësuar Bordin Drejtues të Organit Shqyrtues të Prokurimit, një institucion që funksionon si gjykatë e tenderëve.
Organi Shqyrtues i Prokurimit është organ i pavarur i themeluar në korrik të vitit 2008.
Emrat e Bordit Dejtues të OSHP-së propozohen nga Qeveria, pastaj Kuvendi i Kosovës themelon një organ përzgjedhës të pavarur të përbërë nga tre gjykatës të emëruar sipas rregullit të caktuar nga Këshilli Gjyqësor i Kosovës.
Organi përzgjedhës rekomandon emërimin e anëtarëve të rinj, të cilët duhet të marrin miratimin nga parlamentarët.
Dy muaj pasi Bordi i OSHP-së, vazhdonte të ishte jofunksional, Qeveria e Kosovës mori vendimin e parë për emrat që do t’i procedonte në Kuvendin e Kosovës.
Qeveria e Kosovës më 19 shtator të vitit të kaluar pati marrë vendim që për kryesues dhe anëtarë të Organit Shqyrtues të Prokurimit të jenë: Hysni Hoxha, kryesues dhe Ekrem Salihu, Tefik Sylejmani dhe Vjollca Kurtishaj anëtarë.
Këta emra do t’i dërgoheshin Kuvendit të Kosovës për miratim.
Por Kuvendi i Kosovës nuk kishte aprovuar më 12 dhjetor 2013 listën e të emëruarve të propozuar nga Qeveria.
Emërimi i kryetarit dhe i anëtarëve të Organit Shqyrtues të Prokurimit kishte marrë vota të pamjaftueshme për miratim. Pro ishin vetëm 42 vota, kundër 42 dhe abstenime 3 nga 92 deputët sa kanë qenë në seancë.
Një vendim të njejtë po me këta emra për kryesues dhe anëtarë, Qeveria e Kosovës, e pati marrë edhe në fund të muajit dhjetor të vitit të kaluar.
Vendimi i datës 27 dhjetor 2013 ishte ndryshuar nga ana e Qeverisë së Kosovës më 22 janar 2014, kur listës për anëtarë i ishtë shtuar edhe Bajram Zogiani.
Zogiani i ishtë shtuar listës së të propozuarve nga ana e Qeverisë pasi, Osman Kryeziu anëtari i vetëm me mandat në Bordin e OSHP-së ndërroi jetë.
Kuvendi i Kosovës në seancën e mbajtur më 7 shkurt miratoi emrat që do të përbëjnë organin përzgjedhës për emërimin e Bordit të OSHP-së.
Organi Përzgjedhës do të përbëhet nga Valdete Daka nga Këshilli Gjyqësor i Kosovës, Asllan Krasniqi nga Gjykata Themelore e Prishtinës dhe Nebojsa Boric nga Gjykata Supreme.
OSHP: 204 ankesa të pashqyrtuara
204 ankesa nga operatorët e ndryshëm ekonomikë kanë mbetur të pashqyrtuara për shkak të mosfunksionimit të Bordit të Organit Shqyrtues të Prokurimit, në periudhën gusht-dhjetor, sipas OShP-së.
Vlera e tenderëve për të cilët është paraqitur ankesë në atë që njihet si gjykatë e tenderëve mbërrin vlerën në rreth 52 milionë euro.
“Në mungese të Bordit të OSHP-se për vitin 2013 kanë mbetur 213 ankesa pa vendime”, njofton Zyra për Media e OSHP-së.
Autoritetet publike, bazuar në raportet e Komisionit Rregullativ të Prokurimit Publik shpenzojnë rreth 700 milionë euro në vit prokurime, ku rreth 20 për qind e tyre shqyrtohen nga gjykata e tenderëve.
“Lidhur me këtë gjendje të mbetur, OSHP-ja me kohë ka njoftuar Qeverinë dhe Kuvendin e Kosovës”, thonë në OShP.
Ky bord nga gushti i vitit të kaluar deri në nëntor funksionoi me vetëm Osman Kryeziun, anëtarin e vetëm të bordit, i cili më 21 nëntor ka ndërruar jetë.
Katër prej pesë anëtarëve të bordit drejtues u kishte skaduar mandati deri në fund të muajit korrik 2013.
Dy anëtarëve Baki Krasniqit e Ekrem Salihut u kishte përfunduar mandati më 31 korrik të vitit 2012.
Bordi Drejtues i OSHP-së kishte funksionuar me vetëm tre anëtarë deri më 31 korrik të vitit 2013, kur i skadoi mandati edhe kryetarit Hysni Hoxha dhe anëtarit Tefik Sylejmani.
Hysni Hoxha, Ekrem Salihu dhe Tefik Sylejmani janë propozuar sërish nga Qeveria e vendit për Bordin e ri të OShP-së.
Hoxha në pozitën e kryesuesit, ndërsa Salihu e Sylejmani si anëtarë të këtij bordi.
Gazeta Jeta në Kosovë më 9 shtator të 2013-ës, pati raportuar se si Qeveria e Kosovës nuk po lëvizë drejt plotësimit të Bordit Drejtues të Organit Shqyrtues të Prokurimit, përkundër se ishte njoftuar dy muaj para skadimit të mandatit të tij, siç parashihet me Ligjin e Prokurimit Publik.
Ish-kryetari i OSHP-së Hysni Hoxha, i pati thënë gazetës se mosfunksionimi i këtij institucioni mund të çojë në dëmtimin e buxhetit nga nënshkrimi i kontratave të dëmshme.
“OSHP-ja është formuar për të mbrojtur kompanitë nga shkeljet e institucioneve, por tash nuk mund ta kryejë këtë funksion”, pati thënë Hoxha në shtator të vitit të kaluar.
Por, procedurat e prokurimit mund të vazhdojnë, edhe përkundër mosfunksionimit të Bordit të OSHP-së.
Ligji i Prokurimit Publik nuk specifikon se çfarë duhet të ndërmerret në situata të tilla.
Hoxha pati thënë se në këto raste zbatohet Ligji për Procedurat Administrative.
Gjykata e tenderëve publikoi në mars të vitit 2013 raportin e punës për periudhën janar-dhjetor të vitit 2012.
Raporti tregoi se prej themelimit të institucionit më 2008, e deri më 31 dhjetor të vitit 2012, janë shqyrtuar 1 mijë e 517 ankesa të operatorëve ekonomikë që nuk janë shpallur fitues në tenderët publikë.
Prej 1 mijë e 517 ankesave ajo ka kthyer në rivlerësim 359 lëndë prokurimi, ndërsa ka anuluar në tërësi 273 aktivitete prokurimi që i vlerësoi si të kundërligjshme.
“Numri i rasteve i kthyer për rivlerësim dhe ri-tenderim në lidhje me shkeljet e gjetura nga ana e organit shqyrtues tregon që specifikimet teknike të paqarta vazhdojnë të jepen në Kosovë”, thuhet në Raportin e Progresit.