Sllovenët Dyshojnë se MPB-ja Manipuloi Tenderin e Ri të Pasaportave
Kompania CETIS nga Sllovenia dyshon se tenderi i ri milionësh për furnizim të kosovarëve me pasaporta elektronike është manipuluar.
Sllovenët dyshojnë edhe mundësinë e marrëveshjes paraprake ndërmjet Ministrisë së Brendshme të Kosovës dhe kompanisë “Giesecke& Devrient” GmbH.
Gjermanët fituan tenderin për furnizim me rreth 1 milion pasaporta biometrike për Kosovën, të të gjitha llojeve përgjatë 36 muajve të ardhshëm, të enjten e kaluar, me ofertën e tyre prej 6,631,896 eurosh.
G&D është më e shtrenjtë se CETIS për rreth 140 mijë euro.
Përkundër kësaj, garancia e sjelljes së 10 mijë pasaportave për 30 ditë nga dita e nënshkrimit të kontratës, e mundi CETIS-in.
Ofertat e CETIS-it dhe G&D-së ishin të vetmet që ishin vlerësuar të përgjegjshme (që kanë plotësuar kriteret).
Kompania sllovene edhe në vitin 2011 ishte afër të fitonte tenderin që atëherë e fitoi kompania austriake OeSD, me të cilën tash MPB-ja ka ndërprerë kontratën dhe po zhvillohen hetime për zhdukjen e 1.4 milionë eurove.
CETIS-i kësaj here humbi për 5 pikë. Sjellja e pasaportave brenda 90 ditëve, siç është kërkuar në tender nga Ministria, ka marrë 3.33 pikë kurse çmimi i ofertës ka marrë 90 pikë, në total 93.33 pikë.
E gatishmërinë e sjelljes së pasaportave për 30 ditë nga G&D, komisioni e vlerësoi me 10 pikë kurse çmimin e saj të ofertës me 88.11 pikë, në total 98.11 pikë.
CETIS-i është zhgënjyer shumë. “Kemi përshtypjen se jemi eliminuar padrejtësisht”, tha kjo kopani për Gazetën Jeta në Kosovë.“Jemi jashtëzakonisht të zhgënjyer”.
“Kemi përshtypjen se jemi eliminuar padrejtësisht. Jemi jashtëzakonisht të zhgënjyer” CETIS
G&D nuk dëshiron të komentojë detajet derisa procesi i tenderit të përmbyllet. “Por G&D është e vetmja kompani në botë që disponon vetë tërë zinxhirin e prodhimit të pasaportave”, thotë Heiko Witzke, shef për marrëdhënie me media në G&D.
Dyshimet e CETIS-it
CETIS nuk beson se është e mundshme të bëhet prodhimi, testimi dhe sjellja e 10 mijë pasaportave të para brenda 30 ditëve.
Përveç në kushte të caktuara.
“Si ekspertë me shumë vjet përvojë, besojmë se pasaportat e cilësisë së lartë nuk mund të prodhohen dhe të dorëzohen brenda 30 ditësh”, thotë CETIS-i për Gazetën Jeta në Kosovë. “Mendojmë se kjo pikë ka mundësi të jetë subjekt i manipulimit”.
Manipulimi besojnë se mund të jetë bërë në dy mënyra. “Kompania fituese ka stoqe pasaportash të gatshme për dikë tjetër, ose kanë rënë dakord paraprakisht dhe kanë prodhuar kopje pasaportash para kohe”.
Nëse do të ishte kështu, CETIS-i thotë se do të sillte edhe ajo pasaportat më shpejt se për 30 ditë.
CETIS-i ka dyshime edhe me të kaluarën e disa prej ofertuesve. “Është gjithashtu e nevojshme të përmendet se të gjithë ofruesit nuk ishin në gjendje të dëshmojnë historinë e pastër penale”.
Gazeta Jeta në Kosovë i ka kërkuar Agim Islamit, drejtorit të prokurimit në MPB, sqarime lidhur me dyshimet e ngritura nga CETIS-i. Ai nuk ktheu përgjigje.
Islami ditë më parë për Gazetën Jeta në Kosovë tha se secila kompani në kuadër të deklaratës nën betim, ka dorëzuar dokumentin përkatës nga gjykata e shtetit nga vjen.
Gazeta Jeta në Kosovë raportoi javën e kaluar se D&G në vitin 2010 është hetuar nga autoritetet gjermane, por zyrtarët e saj thonë se dolën të pastër. Ajo ka pasur kontratë edhe me OeSD-në austriake, së cilës këtë muaj Ministria e Brendshme ia ndërpreu kontratën pas skandalit të zhdukjes së 1.4 milionë eurove.
“Në asnjë rast, OeSD-ja nuk ka marrë komponentë të tilla si këta çipa nga G&D-ja, për të përmbushur kërkesën e saj në Kosovë” G&D
“Supozojmë se ne mesin e tyre (çipave të blerë nga OeSD prej G&D-së) mund të jenë ato që gjenden në pasaportat ekzistuese të Kosovës”, thotë CETIS. “Prandaj i bie që edhe ata janë pjesë e zinxhirit të furnizimit të diskutueshëm me pasaporta ekzistuese”.
Por Heiko Witzke nga G&D, ditë më parë tha për Gazetën Jeta në Kosovë se këta çipa nuk kanë mbërritur në pasaportat biometrike të Kosovës, në kohën sa MPB-ja furnizohej nga OeSD-ja.
Ai e ka pranuar se G&D e ka furnizuar OeSD-në me çipa, por jo për pasaportat kosovare.
“Në asnjë rast, OeSD-ja nuk ka marrë komponentë të tilla si këta çipa nga G&D-ja, për të përmbushur kërkesën e saj në Kosovë”, tha Witzke.
Zyrtarët e CETIS-it mendojnë se pavarësisht ndërprerjes së kontratës ndërmjet MPB-së dhe OeSD-së, ofruesit e ri janë përafërsisht të njëjtit.
“Metoda e marrjes së kontratës, nga këndvështrimi ynë është mjaft e diskutueshme”, thonë në CETIS. “Besojmë se mund të ketë rrethana që nuk janë tërësisht në përputhje me kërkesat e dokumentacionit të tenderit dhe ligjin në fuqi”.
Dyshimet gjatë procesit
CETIS thotë se përfaqësuesit e G&D-së nuk ishin prezentë gjatë inspektimit të sistemit të sistemit dhe ndërtesave ku bëhet personalizimi i dokumenteve në Kosovë.
“Ishin përfaqësuesit e gjashtë kompanive të interesuara, por jo ata të G&D-së. Ata e kanë humbur datën e caktuar për vizitë”, thonë nga CETIS-i. “Megjithatë, atyre u ishte lejuar vizitimi i ndërtesave jashtë orarit të caktuar zyrtarisht për vizitë”.
“Jo, nuk do të ankohemi. Kanë zgjedhur dikë tjetër dhe kaq. “Repsektojmë vendimin e MPB-së dhe nuk do të parashtrojmë asnjë ankesë” AKD
Dyshimi tjetër për zyrtarët e CETIS-it ka të bëjë me dokumentet e tenderit ku kërkohet standardi BSI-CC-PP-0056-V2-2012 për çipa. Kjo është një certifikatë sigurie që mbulon të gjitha të tjerat.
“Me sa dimë ne, nga të gjitha kompanitë konkurruese, vetëm G&D-ja plotësonte këtë standard”, thonë sllovenët. “Për ne mbetet mister se si u vendos që ky standard të bëhej pjesë e kushteve të dokumenteve të tenderit?”.
Dyshimi tjetër për CETIS-in ka të bëjë me hapjen e tenderit. Ata thonë se përkundër faktit që ekzistonin dy kritere bazë – çmimi 90 për qind dhe furnizimi në kohë 10 për qind, në hapjen e tenderit ishin prezantuar vetëm çmimet e ofertuara.
Hapja e ofertave të kompanive është bërë me 19 shkurt, një ditë pas përmbylljes së afatit për dorëzim ofertash. Atë ditë janë përmendur vetëm çmimet e ofertave.
CETIS-i thotë se kjo është dokumentuar edhe në regjistrat zyrtarë. Edhe këtu, sipas saj, mund të kishte mundësi të manipulimit të mëvonshëm të dokumenteve të tenderit.
Sllovenët thonë se në të gjithë tenderët publikë që kanë marrë pjesë, të dhënat e ofertuesve të konkurrentëve që ndikojnë në vendimin përfundimtar, janë bërë publike gjatë hapjes së dokumentacionit.
“Besojmë se në këtë rast ata duhet të kishin publikuar çmimin dhe kohën e furnizimit, të cilat kanë luajtur padyshim një rol të rëndësishëm në zgjedhjen e furnizuesit”.
Vlerësimi e diskualifikimi i kompanive
Me gjithë këto dyshime, CETIS-i ende nuk ka vendosur si do të veprojë. Ata thonë se kanë nevojë për qasje në dokumente e pastaj të merret vendimi se si të veprohet. Me gjasë, thonë, kanë për t’u ankuar.
“Besojmë se konkurrenca në vetvete nuk ishte bërë transparente konform me dokumentacionin e tenderit dhe legjislacionin”, thonë nga kjo kompani.
“Hapat e ardhshëm të CETIS-it do të bëhen të njohura pas shqyrtimit të dokumentacionit, sigurisht javën e ardhshme”.
Ndryshe nga CETIS-i, zyrtarë të kompanisë kroate AKD që në garë ishte si konzurcium me King ICT, thonë se nuk do të ankohen.
“Jo, nuk do ta bëjmë këtë. Kanë zgjedhur dikë tjetër dhe kaq”, thotë Kenan Hadzavdic, shef i shitjes në këtë kompani. “Repsektojmë vendimin e MPB-së dhe nuk do të parashtrojmë asnjë ankesë”, thotë ai për Gazetën Jeta në Kosovë.
“MORPHO nuk ka ofruar dëshmi për hapjen e filialit në Kosovë, kanë dorëzuar CV të pakompletuar të projekt-menaxherit, për tre ekspertë ka dorëzuar certifikata por jo CV-të dhe nuk ka garantuar se brenda 90 ditësh do të sjellë pasaportat e para”
Gjatë procesit të vlerësimit të ofertave nga komisioni, prezentë ishin edhe zyrtarë të Agjencisë Kundër Korrupsionit e KDI-së.
Gazeta Jeta në Kosovë ka parë raportin përfundimtar sipas të cilit rezulton se kompania MORPHO që ka ofruar tenderin 10.2 milionë, nuk ka plotësuar disa kushte.
Ata nuk kanë ofruar dëshmi për hapjen e filialit në Kosovë, kanë dorëzuar CV të pakompletuar të projekt-menaxherit, për tre ekspertë ka dorëzuar certifikata por jo CV-të dhe nuk ka garantuar se brenda 90 ditësh do të sjellë pasaportat e para.
Kompania AKD me ofertën 6.1 milionë euro, nuk është shpallur e përgjegjshme sepse nuk ka dorëzuar certifikatë të sigurisë së lartë nga organi kompetent që dëshmon për sigurinë e dokumenteve.
Ajo ka dorëzuar një certifikatë të Qeverisë kroate në lidhje me këtë pikë, por kjo për anëtarët e Komisionit ishte e pamjaftueshme për të garantuar sigurinë e dokumentacionit.
Vendimi për kompaninë fituese G&D është nënshkruar kurse afati i ankesave në Organin Shqyrtues të Prokurimit është dhjetë ditë duke nisur nga 1 marsi.
Në rast se nuk ka ankesa, kontrata ndërmjet MPB-së e G&D mund të nënshkruhet me 11 mars, në rast të kundërt, duhet pritur derisa të shqyrtohen ankesat.
