Moskuptimet e ‘Devolli Group’

Të nderuar, 

me datën 3 tetor 2011, Gazeta Jeta në Kosovë, e cila është prodhim i Rrjetit Ballkanik për Gazetari Hulumtuese (BIRN) ka publikuar shkrimin me titull “Ligji Nuk Peshon sa Devolli”. 

Me datën 10 tetor 2011, BIRN ka pranuar përmes faksit një letër me kërkesë nga ana e përfaqësuesit tuaj ligjor, Virtyt Ibrahimaga, për të larguar publikimin e shkrimit hulumtues nga hapësira e gazetës. 

Për më tutje, përfaqësuesi juaj ligjor, në po të njëjtën letër, ka kërkuar që këtë shkrim ta demantojmë me një publikim edhe në gazetën “Zëri”, ku artikulli jonë ishte ribotuar, në afat prej shtatë ditësh.

Edhe përkundër faktit që letra e përfaqësuesit tuaj ligjor ishte e mbushur me mllef dhe keqkuptime të ligjeve të Kosovës, ne ju falënderojmë për kontaktin tuaj ngase jemi të interesuar që publikut tonë t’ia paraqesim edhe qëndrimet tuaja zyrtare lidhur me këtë rast.

Në këtë kuptim, jemi shumë të interesuar të mësojmë se si e komentoni faktin që në letrën e përfaqësuesit tuaj ligjor, në paragrafin e dytë të faqes së parë, thuhet se: 

“…të qenit nën hetime nuk është pengesë për të qenë i angazhuar në afarizmin ekonomik. Sipas rregullave të privatizimit vetëm personat e dënuar për vepra penale nuk janë të lejuar të marrin pjesë në tender…”. 

Arsyeja pse na intereson kjo është sepse hulumtimi jonë tregon që “Rregullat e Tenderit për privatizimin e Ndër. së Re ‘Fabrika e Amortizatorëve’ Sh.P.K./ Vala 45 A përmes metodës spin-off” përcaktojnë udhëzimet dhe procedurat për dorëzimin e ofertës. Neni 3 i këtij dokumenti rregullon çështjen e ndalesës në ofertim, pra përcakton qartë se kush ka, gjegjësisht kush nuk ka të drejtë ofertimi. Konkretisht Neni 3, pika 3.1:

e) personat fizikë që janë shpallur fajtor për ndonjë krim që është kryer pas muajit qershor 1999 apo që në ndonjë mënyrë tjetër i nënshtrohen procedurave penale.

Pra, në shkrimin tonë, ne jemi thirrur në nenin i cili qartë e ndalon që kompanitë dhe individët që janë nën hetime, e besojmë që përfaqësuesi juaj ligjor do t’ua konfirmojë që hetimet janë pjesë e procedurës penale, e kanë të ndaluar të konkurrojnë për blerjen e ndërmarrjes. Për këtë arsye, jemi të interesuar që lexuesëve tonë t’u raportojmë se cili do të ishte komenti juaj i respektuar në nenin 3.2 të po të njëjtës rregullore:

3.2 Çfarëdo oferte e dorëzuar nga një person me ndalesë ofertimi do të diskualifikohet automatikisht, pavarësisht nga fakti nëse oferta e tillë është në pajtim të plotë me kushtet dhe afatet e përcaktuara në këto Rregulla për Tender. 

Shkrimi i Gazetës Jeta në Kosovë sqaron se bastisjet në zyrat e korporatës Devolli kanë ndodhur më 15 korrik 2010. Në bazë të Agjencisë Kosovare të Privatizimit (AKP), data e fundit për parakualifikim në Valën 45A ka qenë 20 tetor 2010, e data për ofertim ka qenë 27 tetor 2010. Gjithashtu, sipas komunikatës për media të AKP-së për Valën e 45 A, në të cilën bëjnë pjesë dy ndërmarrjet e përmendura në shkrim, oferta është shpallur me datën 7 shtator 2010. 

Sipas llogaritjeve tona, bastisjet janë kryer 52 ditë me herët. Pra, Devolli Group në këtë kohë iu kishte nënshtruar procedurave penale – bastisjeve sipas autorizimit të gjykatësit së procedurës paraprake të EULEX-it, nën mbikëqyrjen e prokurorisë speciale të Kosovës. 

Me kujdes e kemi lexuar letrën e përfaqësuesit tuaj ligjor kur thotë se në atë kohë, propozim akuza nuk ka qenë e publikuar, por duke e pasur parasysh se hetimet janë gjithashtu pjesë të procedurave penale të rregulluara me Kodin e Procedurës Penale të Kosovës (KPPK) dhe se ne nuk kemi përmendur asnjëherë propozim-akuzën, e kemi paksa të paqartë qëndrimin dhe përgjegjen tuaj, andaj jemi më se të gatshëm që të kuptojmë më qartë se cili është interpretimi juaj i KPPK-së në lidhje me këtë çështje. Jemi të bindur se edhe lexuesit tanë do ta lexonin këtë përgjegje me shumë kurreshtje. 

Në vazhdim të letrës, më saktësisht në pjesën e dytë e kërkesës tuaj, ju keni pasur mirësinë që, përmes përfaqësuesit tuaj ligjor, ta ngrisni çështjen e përmbushjes së kritereve nga ofertuesit. Konkretisht, përfaqësuesi juaj ligjor, në emrin tuaj, e ka përmendur fitimin e tenderit në procedura të ankandit publik. 

Nëse e lexoni edhe njëherë shkrimin tonë, do të gjeni se ne e kemi përmendur faktin se Ndërmarrja e Re “Fabrika e Amortizatorëve” SH.P.K është privatizuar për vlerën 2,050,000 euro, përderisa agjencitë e shitblerjes së patundshmërive, të konsultuara nga Gazeta Jeta në Kosovë, për shkak të ekspertizës dhe përvojës së tyre në baza ditore me çmimet e tregut të patundshmërive, kanë deklaruar që vlera e kësaj ndërmarrje do të duhej të ishte të paktën 5.1 milionë euro. Pra, Gazeta Jeta në Kosovë ka raportuar duke u përmbajtur nga konkludimet ose tendencat për të dhënë ekspertizë vetanake të çmimit të shitjes. 

Besoj se do të pajtoheni që një medium ka të drejtë të konsultojë dhe paraqesë mendimet e zyrtarëve të agjencive për patundshmëri, duke ndjekur parimet dhe standardet profesionale të gazetarisë. Ju lusim që të argumentoni të kundërtën, në mënyrë që të mos i mbetemi borxh lexuesëve. 

Për më tepër, përfaqësuesi juaj ligjor, në emër tuajin, në letrën e tij të cilën na e ka dërguar me 10 tetor 2011, decidivisht ka deklaruar se “asgjë e paligjshme nuk ka ndodhur në këtë rast”. Përsëri, me resurset tona modeste, ne kemi konsultuar tabelën e rezultateve të ofertave të AKP’së vala 45 A për Ndërmarrjen e Re Fabrika e Amortizatorëve dhe e kemi parë se  Sh.P.K Devolli Group ka qenë i vetmi ofertues. 

Poashtu, kemi konsultuar përsëri Rregullat e Tenderit  për privatizimin e  Ndër. së Re ‘Fabrika e Amortizatorëve’ Sh.P.K./ Vala 45 A përmes metodës spin-off. Ja çfarë kemi gjetur në Nenin 15 të këtij dokumenti: 

Neni 15 Shtyrja ose anulimi i tenderëve   

Neni. 15.2 Duke mos kufizuar përgjithësinë e nenit 15.1 dhe pa paragjykuar për çfarëdo shkaku tjetër të shtyrjes ose anulimit të tenderit të përcaktuar në këto rregulla për tender, Bordi në rrethanat e paraqitura në vijim mund të marrë vendim përmes së cilit Agjencia urdhërohet të shtyjë ose të anulojë tenderin:

15.2 b) nëse më pak se tre ofertues të mundshëm janë regjistruar si ofertues të kualifikueshëm në pajtim me nenin 6 të këtyre rregullave për tender;

Ju sigurojmë se ne plotësisht e kuptojmë dallimin juridik, semantik dhe përmbajtësor në mes të fjalëve “… Bordi… mund…” dhe “… Bordi…duhet…”, por në mungesë të sqarimeve dhe duke i marrë parasysh të gjitha rrethanat tjera të cilat e kanë përcjellë këtë rast, duke u munduar të raportojmë sa më mirë për lexuesit tanë, etika jonë profesionale nuk na ka lejuar që ta heshtim edhe këtë detaj. 

Në pjesën e tretë dhe të fundit të letrës të cilën përfaqësuesi i juaj ligjor na e ka dërguar, ju pretendoni se konkludimi i Gazetës Jeta në Kosovë “është qesharak dhe qëllimkeq”. Kjo na ka lënduar pak, por kemi qëndruar përmbi këtë konstatim, ngase kemi konsideruar se përfaqësuesi juaj ligjor, edhepse me autorizimin tuaj, ka mundur të mos i ketë artikuluar saktësisht qëndrimet e “Devolli Group”. 

Për këtë arsye, fuqishëm besojmë se lexuesit tonë do të donin të dinin më shumë rreth qëndrimeve tuaja lidhur me pohimet e deputetëve të Parlamentit të Kosovës, të cilave gazeta jonë iu ka referuar. 

Besoj se ju kujtohen seancat plenare të Parlamentit të Republikës së Kosovës në të cilat duke iu referuar “Z-Mobile” është thënë publikisht nga deputetët se llogaritet që PTK’ja ishte dëmtuar me kontratën me ‘Dardafone’ e pastaj ‘Dardafone.net’. 

Po ashtu, “Devolli Group” duhet ta ketë të qartë, sikur që ne besojmë se e ka, se në një llogaritje të tillë përfshihet edhe reputacioni i dëmtuar i PTK-së nga kontrata. Sidomos nëse merren parasysh edhe rrethanat e fundit gjatë kësaj jave, kur mediat kanë raportuar se njëra nga vetëm dy kompanitë e parakualifikuara botërore për privatizim të PTK-së po tërhiqet nga gara pikërisht për shkak të problemeve të korrupsionit që involvojnë këtë ndërmarrje publike. 

Gazeta Jeta në Kosovë ka për qëllim informimin e drejtë të publikut, me synim ofrimin e lajmit objektiv, me kohë dhe analizën e tij profesionale e të paanshme, duke ndjekur standardet më të larta të gazetarisë botërore. Besoj se këtë e kemi dëshmuar në punën tonë të deritanishme.

Shkrimi “Ligji Nuk Peshon sa Devolli” është zbatim i premtimit të gazetës për lexuesit tanë i cili duhet të jetë i sigurt se kjo gazetë do të vazhdojë të sjell pikërisht tema të tilla. 

Mu për këtë arsye, ne jemi shumë të gatshëm që publikut tonë t’ia sjellim edhe komentet tuaja. 

Do të preferonim që këto komente të jenë dhënë drejtpërsëdrejti dhe personalisht nga Shkëlqim Devolli dhe/ose Blerim Devolli e Ismet Bojku. 

E shohim si jo fort adekuate që “Devolli Group” të komunikojë me ne përmes ndërmjetësuesve të autorizuar ligjorë, ngase, në njërën anë, ne nuk e konsiderojmë vehten si autoritete gjykuese; ndërsa në anën tjetër e kemi përshtypjen që publiku do ta konsideronte një komunikim të tillë me ndërmjetës të autorizuar ligjor si fshehje, ose edhe më keq, si shpërfillje të nevojës për të dhënë sqarime lidhur me një çështje kaq të rëndësishme si fati i Fabrikës së Amortizatorëve.

Do të donim që të bindemi se “Devolli Group” nuk ka asgjë për të fshehur, se do të jetë transparent ndaj publikut kosovar dhe se do të jetë i gatshëm të përgjigjet në pyetjet tona për hirë të informimit të drejtë. 

Ju sigurojmë, se ne jemi të gatshëm që sa më shpejtë t’ju intervistojmë dhe ta publikojmë këtë intervistë në tërësi.

Duke besuar se ju do të keni mirësinë që të ndani pak nga koha juaj e vlefshme, ju presim që sa më shpejtë të na e caktoni një intervistë.

Sinqerisht,

BIRN