Kolegji Victory- 450 Mijë Euro Borxhe ndaj Shtetit
Bedri Selmani, pronar i “Kosova Petrol-it” që bën biznes me 35 pompa të derivateve që nuk kanë licencë për të vepruar në tregun e naftës, përveç që ka borxhe ndaj shtetit për qira të papaguar dhe akuza nga punëtorët e tij për mosdhënie të pagave, ka borxhe edhe ndaj Administratës Tatimore.
Kolegji universitar “Victory” që Selmani e kishte hapur në vitin 2006, ka një borxh prej 450 mijë eurosh ndaj ATK-së.
Moskryerja e obligimeve ndaj ATK-së, e shtyri këtë institucion që të mërkurën e javës së kaluar- me 23 prill- të ndalë punën e kolegjit “Victory”, për disa orë.
Ndalimi i punës u ndërpre në të njëjtën ditë pas një marrëveshjeje në mes të dy palëve, e cila parasheh që “Victory” të kryejë me këste obligimet që ka ndaj shtetit në afat prej 24 muajsh.
Nëse nuk bëhet respektimi i pagesave sipas marrëveshjes së nënshkruar, ATK-ja thotë se do të zbatojë legjislacionin tatimor të Kosovës duke e mbyllur prapë këtë institucion.
Borxhi i grumbulluar prej 450 mijë eurosh, sipas Zyrës për Informim në ATK, ka të bëjë me mospagesë të tatimit mbi vlerën e shtuar, tatimit të mbajtur në burim, qirasë dhe kontributeve pensionale.
ATK-ja i tha Gazetës Jeta në Kosovë se ky biznes ka borxhe ndaj shtetit që prej vitit 2007 dhe se për gjashtë vjet ka arritur shumën e 450 mijë eurove.
Por në kolegjin “Victory” thonë se borxhi daton që nga viti 2009 e jo nga viti 2007.
Sipas përgjigjeve që ky institucion arsimor ka dhënë për Gazetën Jeta në Kosovë, borxhi është krijuar pasi që studentët nuk kanë bërë pagesat e shkollimit.
“Për arsye të grumbullimit të borxheve të studentëve që nga viti 2009 e deri më tani, kolegjit ‘Victory’ rrjedhimisht i është grumbulluar po ashtu një borxh në Administratën Tatimore të Kosovës”, tha Skënder Syla, shef i administratës në kolegjin “Victory”.
Syla tha se tash e tutje kolegji do të paguajë borxhet me këste ashtu siç është marrë vesh me Administratën Tatimore të Kosovës.
Kolegji Victory i themeluar në vitin 2006, ka studentë në programet e studimeve universitare në drejtimet Politikë Ndërkombëtare dhe Diplomaci, Ekonomi Biznesi-Tregti e Jashtme, Menaxhim të Biznesit Ndërkombëtar dhe Ekonomiks dhe Menaxhment në nivelin bachelor. Sipas uebfaqes për t’i ndjekur ligjëratat në këto drejtime, studentët duhet të paguajnë 1 mijë e 200 euro.
Ndërkohë biznes me të njëjtin emër sikurse kolegji, Bedri Selmani kishte ndërtuar hotelin në pronën e ndërmarrjes shoqërore “Auto Prishtina”, te rrethi i madh në Prishtinë.
Më shumë rreth aktiviteteve të Bedri Selmanit mund të lexoni këtu:
Shteti “Gjunjëzohet” para Njerëzve të Pushtetshëm
Mesic e Sanader Nuk e Lëkundën Kosova Petrol’in
Bedri Selmani Miliona Euro Borxh Shtetit
Kontrollon Hotelin “Victory” Përkundër Vendimeve të Gjykatave
Aplikacione të Pasuksesshme të Biznesmenit të Fuqishëm
Shteti e Çon në Gjyq Kosova Petrol-in
Zvarritja e Shtetit Dështon Afatin e Kryerjes së Rrethrrotullimit
