Izraeli Arreston Ndërmjetësuesin e Transplantimit të Veshkave

Prokurori Jonathan Ratel ka njoftuar të enjten, që në fillim të seancës së radhës në Rastin Medicus, se pas kërkesës së prokurorisë kosovare për ndihmë juridike ndërkombëtare drejtuar Izraelit, autoritetet e atjeshme kanë filluar hetime dhe kanë kryer një seri arrestimesh, përfshirë edhe të dyshuarin kryesor Moshe Harel.

“Në kuadër të këtyre hetimeve, ata kanë arrestuar 10 persona, në mesin e të cilëve është edhe Moshe Harel”, tha prokurori special, Ratel.

Aktakuza e ngritur në vitin 2010 në lidhje me transplantimet ilegale në “Medicus”, ngarkon si dy persona kryesorë Moshe Harelin dhe Yousuf Sonmezin, i pari izraelit i lindur në Turqi, e i dyti turk. Harel mendohet të ketë ndërmjetësuar dhe organizuar transplantimin e veshkave, kurse kirurgu Somnez të ketë kryer operacionet.

Pas njoftimit të prokurorit, mbrojtja u interesua se cilat do të jenë veprimet e prokurorit pas arrestimit të Harelit.

Prokurori tha se do të bëjë çdo përpjekje dhe bëri të ditur se ai tanimë ka filluar kontaktet me autoritetet izraelite që ta ekstradojë Harelin në Kosovë. Por kjo, tha ai, është një procedurë që duhet të kalojë nëpërmjet dy ministrive të drejtësisë.

Po ashtu, të enjten avokati Ismet Shufta deklaroi se në sallën e gjykimit, në pjesën e publikut, gjendej edhe avokati mbrojtës i dr.Yousuf Somnezit, nga Turqia.

Kryetari i kolegjit urdhëroi avokatin që ta lëshonte menjëherë sallën e gjykimit, kjo pasi që ai mund të mblidhte informata shumë të rëndësishme për mbrojtjen e Somnezit.

Avokati Shufta, pas daljes së avokatit të Somnezit, tha se avokati ishte këtu t’i tregonte gjykatës se Somnezit ishte gati të të bashkëpunonte me EULEX-in, por vetëm në kushte të veçanta.

Avokati Hilmi Zhitia deklaroi se nuk është e mundur që Somnezi të paraqitet si dëshmitar bashkëpunues, meqë këtë e ndalon Kodi i Procedurës Penale. E avokati Shufta tha se u keqkuptua dhe se qëllimi i Somnezit nuk është që të jetë dëshmitar bashkëpunues.

Ndërkohë, në seancën e fundit kolegji pësoi një ndryshim. Në vend të gjykatësit Hamdi Ibrahimi, në panel u caktua Vahid Halili. Gjyqtari Ibrahimi pak ditë më parë ishte caktuar kryetar i Gjykatës së Qarkut në Prishtinë.

Seanca e radhës do të mbahet me datën 14 qershor 2012 nga ora 9, dhe si dëshmitarë pritet të dëgjohen dhjetë izraelitë, përmes video-lidhjes.