Ish Avokati i Popullit për rastin në UP: Nuk u tajtua si duhet nga aspekti ligjor

Ish Avokati i popullit, Hilmi Jashari ka vlerësuar se rasti i ngacmimit seksual i raportuar së fundmi në Universitetin e Prishtinës, nuk është trajtuar si duhet nga aspekti ligjor dhe ka shkaktuar pasoja.

Profesori i rregullt i Fakultetit të Edukimit në UP, Xhevat Krasniqi, tashmë i dyshuar për ngacmim seksual, është denoncuar nga 27 studente të Fakultetit të Mjekësisë për ngacmim seksual, ku ishte i angazhuar si profesor i lëndës së matematikës.

Më 23.04.2024, Krasniqin e ka pezulluar nga puna rektori i UP-së, Qerim Qerimi pas rekomandimit të Këshillit të Etikës së UP-së që ai të jetë i pezulluar derisa të përfundojnë veprimet hetuese nga ana e Prokurorisë së Shtetit lidhur me denoncimin për ngacmim seksual.

“Unë e shoh që së pari në aspektin ligjor nuk është trajtuar fare ky problem as nga ligjvënësi, është trajtuar në mënyrë shumë të fragmentuar, në disa pjesë të legjislacionit të Kosovës, përfshirë Ligjin për kundërvajtje, Ligjin për mbrojtje nga diskriminimi, barazi gjinore, Kodi Penal. Edhe kur e sheh tash qasja është krejtësisht e ndryshme, nuk e din askush a duhet me shku në procedurë administrative, a duhet ndjekë procedurë kundërvajtëse apo duhet me shku në procedurë penale” – tha Jashari në emisionin “Kallxo Pernime”.

Jashari tregon se çka është dashur të veprojë UP-ja për këtë rast të ngacmimit seksual dhe sipas tij Prokuroria duhet ta trajtojë me urgjencë të duhur.

“Sigurisht se Këshilli i Etikës do duhej me mbajtë një takim, një vlerësim të situatës së krijuar edhe sigurisht që do duhej me marrë një vendim, mirëpo edhe Prokuroria në këtë rast sepse po flasim për vepra penale, Prokuroria do duhej shumë shpejt me trajtu këtë rast, me urgjencë të duhur për shkak të shqetësimit që ka sjellur në opinionin publik, mirëpo edhe për shkak të natyrës që ka” – ka deklaruar ai.

Ai ka treguar se si kanë intervenuar si Institucion i Avokatit të Popullit për një sulm seksual në një shkollë fillore, që ka ndodhur në vitin 2007 ndaj një të miture, prindërit e të cilës janë adresuar te ky institucion.

“Të nesërmen kemi kërkuar prej Policisë me hapë hetime urgjente edhe e dyta, kemi dërguar rekomandimin për suspendimin e menjëhershëm të atij mësimdhënësi. Ka ndodhë suspendimi i menjëhershëm, mirëpo shqetësimi ka qenë pastaj hetimet” – tha Jashari.

Sipas tij, pyetjet e hetueses ishin bërë pa prezencën e psikologut dhe prindërve kur e kanë pyetur të mituren se si kishte ndodhur situata dhe ajo e ka përshkruar.

“’Kemi qenë orë plotësuese dhe mësuesi na ka mbledhë 5-6 veta në klasë, mu m’ka nxitë thotë me shku me pi ujë në qeshmen e oborrit të shkollës, kam dalë, kah jam kthy më ka prit në korridor, më ka futë me një klasë të zbrazët edhe atje e ka prekë, këtë sulm seksual që ka ndodhë” – tregoi Jashari.

Në pyetjen e dytë të hetueses Jashari kujton se e kishte pyetur fëmijën – “E ty a të ka pëlqy?”

Se a e kishte dërguar hetuesen në Inspektorat Policor të Kosovës, Jashari ka thënë se rasti ishte urgjent dhe janë marrë me Prokurorinë, megjithëse ka vlerësuar se ka qenë shkelje e etikës.     

Kurse, dekani i Fakultetit të Edukimit në UP, Blerim Saqipi ka njoftuar se profesori Xhevat Krasniqi punon në Fakultetin e Edukimit nga vitet 2004-2005, në fushën e matematikës.

Ndërsa, nga Fakulteti i Mjekësisë në një përgjigje për KALLXO.com, më 27.03.2024, kanë thënë se profesori Krasniqi ka qenë i angazhuar në këtë Fakultet përafërsisht nga viti akademik 2016/2017, ku ka ligjëruar lëndën e matematikës në programin e Farmacisë

Denoncimin me shkrim për ngacmimin seksual studentet e Fakultetit të Mjekësisë e kishin dorëzuar zyrtarisht më 27.02.2024 në Fakultet.

Pas denoncimit të studenteve, i gjithë menaxhmenti i Mjekësisë, dekan e prodekan, janë mbledhur më 04.03.2024, me ç’rast kanë ftuar edhe profesorin Krasniqi për t’ia kumtuar me gojë denoncimin e studenteve ndaj tij dhe ndërprerjen e bashkëpunimit me të.

Pas këtij takimi, dekania e Fakultetit të Mjekësisë, Suzana Manxhuka- Kërliu, denoncimin e studenteve e kishte përcjellë me shkresë zyrtare në Këshillin e Etikës të UP.

Këshilli i Etikës së UP-së përbëhet nga katër anëtarë burra: Iset Morina (kryetar), Skender Muji, Arben Hajdari dhe Rrezeart Galica.

Pesë javë pas denoncimit të studenteve ndaj profesorit të Shkencave të Matematikës, Xhevat Krasniqi, për ngacmim seksual, më 04.04.2024 u mblodh Këshilli i Etikës së Universitetit të Prishtinës.

Në këtë mbledhje u paraqit edhe vetë Krasniqi, ani pse me gjithë insistimin e Jeta Xharrës, refuzoi të përgjigjet lidhur me pretendimet ndaj tij.

Më 07.04.2024, “Kallxo Përnime” transmetoi rrëfimet e studenteve dhe studentëve të Mjekësisë në Universitetin e Prishtinës, në lidhje me ngacmimet seksuale që pretendohet t’i ketë bërë profesori i shkencave matematikore, Xhevat Krasniqi.

Përveç këtyre tri studenteve, në Kallxo Përnime më 07.04.2024 rrëfyen edhe 3 djem që kishin qenë dëshmitarë të këtyre ngacmimeve seksuale që u ishin bërë vajzave nga viti 2022.

Pesë ditë pas transmetimit të emisionit të Kallxo Përnime për ngacmimet seksuale në Universitetin e Prishtinës, Prokuroria ka autorizuar organet e rendit që të nisin hetimet.

Kryeprokurori Zejnullah Gashi më 12.04.2024 ka konfirmuar për KALLXO.com se janë intervistuar katër dëshmitarë.

“Prokuroria ka autorizuar policinë për të ndërmarrë hetime pas publikimit. Janë intervistuar katër dëshmitarë dhe intervistat televizive janë vendosur në dosjen e Policisë” – tha kryeprokurori Gashi.

Aktivistë të Lëvizjes Feministe Studentore dhe të tjerë pasi bllokuan hyrjen e Rektoratit të Universitetit të Prishtinës më 11.04.2024, për shkak të protestës së tyre gjithëditore të cilën e kishin paralajmëruar më 10.04.2024, u shpërndanë nga Policia e Kosovës me forcë.

Ekipi i KALLXO.com raportoi nga vendi i ngjarjes se disa aktivistë janë tërhequr zvarrë nga Policia e Kosovës, për të zhbllokuar kështu hyrjen e Rektoratit.

Përderisa mbahej protesta e aktivistëve para Rektoratit të UP-së, më 11.04.2024, studentë të Fakultetit të Inxhinierisë Mekanike të UP-së, e bojkotuan mësimin për një orë.

Përveç tyre, edhe studentët e Mjekësisë, ku u raportua ngacmimi seksual në UP, nuk kanë mbajtur mësim. Këtë e kishte konfirmuar për KALLXO.com vetë Fakulteti i Mjekësisë, i cili nuk i është referuar si “bojkot” mosmbajtjes së procesit mësimor, por u janë referuar “mosvijim”.

Këshilli i Etikës i UP-së mbajti mbledhje për këtë rast, më 17.04.2024, në të cilën dëshmuan u dëgjuan si dëshmitarë tre studentë, dy vajza dhe një djalë.

Mbledhja ishte e hapur për media, mirëpo është kërkuar që për shkak të konfidencialitetit të dëshmitareve që janë duke dëshmuar aktualisht, mediat të mos marrin pamje.

Në këtë mbledhje nuk u mor vendim nga KE ndaj Krasniqit, mirëpo KE pati kërkesa ndaj Fakultetit të Edukimit dhe atij të Mjekësisë.

KE i kërkoi Fakultetit të Mjekësisë që ta ridërgojë edhe njëherë listën e nënshkrimeve të studenteve denoncuese në afat prej një jave pasi që, sipas anëtarëve të këtij Këshilli, profesori Krasniqi pretendon se 9 prej nënshkrimeve janë të falsifikuara.

Ndërsa, Fakultetit të Edukimit i kërkoi vlerësimin zyrtar të performancës së profesorit të rregullt, Xhevat Krasniqi, në këtë Fakultet.

Më 18.04.2024, përderisa profesori Krasniqi po mbante ligjëratë me studentët e Fakultetit të Edukimit, aktivistë të Lëvizjes Feministe Studentore kanë hyrë duke fishkëlluar dhe kanë penguar orën, që ka çuar në largimin e studentëve nga klasa, përderisa Krasniqi ka vazhduar të rrijë në klasë.

Këshilli i Etikës u mblodh më 22.04.2024. Para më se 50 studentëve, Xhevat Krasniqi prapë u ftua për të dhënë intervistë e cila u mbajt e hapur para studentëve.

Iset Morina, kryetar i Këshillit të Etikës ka treguar se ka lejuar studentët në këtë seancë me kusht që s’ka xhirime dhe s’ka zhurmë.

Krasniqi e kishte përgatitur një deklaratë dhe e ka lexuar atë, duke dhënë qëndrimin e tij ndaj shprehjeve të përdorura në ankesën e ish-dekanes së Fakultetit të Mjekësisë, Suzana Manxhuka-Kërliu, e cila e ka deponuar ankesën në KE pas raportimit për ngacmim nga studentet e Mjekësisë.

“Shpreh kundërshtimin tim lidhur me atë që më është atribuuar. Pasi që vlerësimi parimor nuk iu ka shkuar për shtati disa njerëzve, ata i kanë shfrytëzuar të gjitha mundësitë që i kanë pasur ndaj meje” – tha Krasniqi.

Ai tha se i kanë keqpërdorur apo joshur disa studentë për të shpifur ndaj tij.

Akuzën për ngacmim seksual nga studentet Krasniqi e ka quajtur “të pavërtetë” dhe “shpifje”. Shprehjet e paraqitura në ankesat e studenteve ai ka thënë se janë shtrembëruar.

“Ejonë ti gjithë Ejona ki me mbet” – Krasniqi tha se e ka kuptimin për një studente që ka bërë zhurmë gjatë ligjëratës, pra sipas tij, jo siç është kuptuar e raportuar “E jonë, ti gjithë e jona ki me mbet”.

Ai tha se nuk i ka përdorur asnjë nga shprehjet që janë në ankesën e FM-së, në asnjë bisedë me studentët, bisedë formale apo jo formale.

“Shprehja e fjalës masazh është shpifje. Se jam afruar dhe kam dashur ta përqafoj është shpifja e radhës” – ka thënë Krasniqi.

Krasniqi tha se i ka falur pikë në një provim një studente, në këtë rast Krasniqi u pyet nga Këshilli i Etikës se cilat ishin motivet që ia ka falur pikët. Ai u përgjigj se në rastet kur studentët janë afër rezultatit të kalueshmërisë ashtu vepron.

Për një studente tjetër, Krasniqi tha se ajo e ka kërcënuar duke i thënë “hajt se ki me pa ti”.

Rreth nënshkrimeve të studenteve të Mjekësisë në ankesën që ka deponuar Fakulteti i Mjekësisë për raportimin e ngacmimit në Këshillin e Etikës, Xhevat Krasniqi pretendon se nëntë nënshkrime të këtyre studenteve janë të falsifikuara.

“Nënshkrimet e tyre i kam krahasu me listat e nënshkrimeve të studentëve gjatë ligjëratave. Dyshoj se nënshkrimet mund të jenë të falsifikuara” – tha Krasniqi.

Ai pretendon se nënshkrimet e listës së ligjëratave nuk janë të njëjta me nënshkrimet në ankesën e Fakultetit të Mjekësisë.

Iset Morina, kryetar i KE, e ka pyetur, se përderisa ai pretendon se 9 nënshkrime janë të falsifikuara, për 18 nënshkrimet tjera a janë të vërteta?

Krasniqi është përgjigjur duke thënë se “nuk ka vërejtur se ato kanë lëshime”.

Pasi që Këshilli nuk mori vendim në mbledhjen e datës 22.04.2024, aktivistë të Lëvizjes Feministe Studentore kanë bllokuar hyrjen e Admnistratës Qendrore të UP-së, duke mos lejuar daljen nga objekti të anëtarëve të Këshillit.

Pas disa orësh bllokadë nga aktivistët, Policia e Kosovës ka larguar nga salla e Admnistratës profesorin Xhevat Krasniqi dhe dy anëtarët tjerë të Këshilli të Etikës, Arben Hajdarin edhe Skender Mujin.

Pas disa minutave, ata intervenuan sërish duke i larguar nga salla edhe kryetarin e Këshillit të Etikës, Iset Morina edhe anëtarin tjetër Rrezeart Galica që kishin mbetur brenda sallës e së cilëve studentët u thanë se “i ka harruar Policia brenda sallës”.

Më 23.04.2024, aktivistet e Lëvizjes Feministe Studentore kanë bllokuar me ngjitës derën e zyrës së profesorit Xhevat Krasniqi, i denoncuar për ngacmim seksual nga 27 studente të Fakultetit të Mjekësisë në Universitetin e Prishtinës.

Letra me mbishkrimet “Skenë krimi! Mos kalo!”, “ Xhevat Krasniqi nuk ke vend në UP”, janë shkruar në derë zyrës së profesorit Krasniqi dhe në hyrje të zyrës.

Ky aksion ishte vazhdim i protestës së aktivistëve që kërkojnë me ngulm përjashtimin e Krasniqit nga Universiteti i Prishtinës, që kur u bë publik lajmi për denoncimin e studenteve.