Prokuroria: Ndalimi i Veliut i Ndarë nga Rasti Pista
Kryeprokurorja e Prokurorisë Themelore të Gjakovës Shpresa Bakia tha për Gazetën Jeta në Kosovë se Policia e Kosovës të enjten në mëngjes ka ndaluar Mentor-Dërgutin-Veliun.
Mentor Dërguti-Veliu ishte intervistuar të mërkurën për rastin e vrasjes së Elvis Pistës, por sipas kryeprokurores ndalimi i tij nuk ka të bëjë asgjë me këtë rast.
“Mentor Dërguti- Veliu në rastin Pista ka qenë vetëm si dëshmitar, ndërsa rasti i ndalimit dhe bastisjes së shtëpisë së tij është rast i veçantë, i cili dyshohet për vepra penale fajde, detyrim dhe lëndim të rëndë trupor ndaj të miturit”, tha Bakia.
Edhe zëdhënësi i Policisë së Kosovë, Brahim Sadria, tha se në Rahovec është ndaluar një person me urdhër të Prokurorisë së Gjakovës, por ai nuk ka treguar emrin e tij dhe arsyet pse është ndaluar.
Kurse, përfaqësuesi ligjor i familjes Pista, Arianit Koci, tha për Gazetën Jeta në Kosovë se nuk mund të komentojë asgjë për shkak të procedurës së hetimeve lidhur me vrasjen e të ndjerit Elvis Pista.