48 Orë Ndalim Për Fadil Vokrrin
Prokurori dhe Policia e Kosovës e konfirmuan rastin.
“Po me vendim të prokurorit i është caktuar ndalimi për 48 orë Fadil Vokrrit”, tha për KALLXO.com Ymer Beka kryeprokuror i Prokurorisë së Prishtinës.
Beka shtoi se Vokrri ende nuk është marrë në pyetje nga ana e prokurorit dhe as nuk është bërë kërkesë për caktimin e masës së paraburgimit ndaj të njëjtit.
Ndërsa Agron Borovci nga Policia e Kosovës dha më shumë detaje pa përmendur emra.
“Me datë 11 korrik, rreth orës 21:00 në rrugën “Fehmi Agani” është shkaktuar një aksident komunikacioni, ku vetura pas aksidentit është larguar nga vendi i ngjarjes”, tha Borovci.
Sipas Borovcit pas hetimeve nga ana e policisë është identifikuar vetura dhe pronari i saj dhe më 17 korrik është arrestuar personi me inicialet F.V.
Borovci tha se F.V dyshohet për dy vepra penale-aksident komunikacioni dhe ikje nga vendi i ngjarjes.
“Si pasojë e këtij aksidenti dy persona kanë pësuar lëndime”, tregoi Borovci.