Zbogar: Nenet u Miratuan Përkundër Këshillave të BE-së

Zbogar dhe Thaçi, gjatë një takimi të mëhershëm

nga Gazeta JnKPrishtinëQershor 22, 201215:40

Përfaqësuesi Special i Bashkimit Evropian dhe shef i Zyrës së BE-së në Kosovë, Samuel Zbogar, ka shprehur zhgënjimin e tij për vendimin e Kuvendit të Kosovës për t’i mbajtur nenet 37 dhe38 të Kodit Penal të cilat rrezikojnë lirinë e mediave në Kosovë.

Zbogar ka shprehur keqardhjen që vendime të tilla merren përkundër këshillave të vazhdueshme prej Bashkimit Evropian që këto nene janë në kundërshtim me konventat e Bashkimit Evropian dhe Acquis që mbron lirinë e fjalës dhe të mediave.

“Nenet për përgjegjësinë penale dhe burimet e informacioneve do të kenë ndikim negativ në lirinë e shprehjes dhe lirinë e mediave në Kosovë”, ka thënë Zbogar.

“Bashkimi Europian mbetet thellësisht i përkushtuar për të promovuar lirinë e shprehjes dhe të mediave si vlera të rëndësishme për konsolidimin e demokracisë se Kosovës, gjë që ishte theksuar në raportin e fundit të progresit”, thuhet në reagimin e përfaqësuesit të BE-së në Kosovë.

“Është për të ardhur keq që ky vendim merret menjëherë pas vizitës së Komisionit Evropian në Kosovë për të vlerësuar progresin dhe aftësinë e Kosovës që të angazhohet në negociata për Marrëveshjen për Stabilizim dhe Asociim. Për më tepër, kjo lë prapa Kosovën në kontekstin rajonal, pasi që shumica e vendeve kanë hequr nenet të cilat kriminalizojnë mediat për përgjegjësitë e tyre”, thekson deklarata.